போர்களுக்கு முந்தைய விருந்துகள்

போர்களுக்கு
முந்தைய விருந்துகள்
சுவாரசியமானவை

கைசேரும்
குவளைகள் நிரப்பும் துளிகள்
உவர்த்த உதடுகளில்
வெண்மைப் படிகமாகி
உலர்வதும்

பின்சேரும்
கரங்கள் அழுந்த
உடையத் தயாராய் இருக்கும்
நினைவின் குமிழிகள்
மௌனம் சுரந்து
முட்டிக் கொள்வதும்

அடரும் இறுக்கம்
விரிய வழியின்றி
இணை சேர்ந்து கிடந்த
கண்ணலைவரிசைகள்
எதிர்கோட்டில்
வலுந்தூர்தலும்

இன்னபிற
இன்னபிற
உம்களும்
உம்களும்..

விருந்துகளின் முடி தருணங்களில்
போதையுற வீழ்ந்து விடல்
உத்தமமான
போதனையாகப் படுகிறது

பொழுதோடு வியர்த்த
பிரியுயிரை எதிர்நோக்க உதவும்
சூனிய சலனங்கள்

எதிராளியும் அயர்ந்திருக்கும்
அவன் விருந்தின்
நிச்சலனம் செவிசேர

விரல்கள் மட்டும்
பின்னியிருக்கும்

போர்களுக்கு
முந்தைய விருந்துகள்
சுவாரசியமானவை


25/01/2010 உயிரோசை மின்னிதழில் பிரசுரமானது