நினைவில் கொள்ளும் கலை.

எதுகையும், மோனையும் இடித்தன.
மோனை - முதல் எழுத்துப் பொருத்தம்.
மு - மோ என்று வைத்துக்கொள்ளச்
சொன்னது
10 D-யின் கனகாங்கி மிஸ்.
90 மதிப்பெண் தமிழில்.

'புஷ்'-ஷும், 'புல்'-லும் குழப்பின.
'ஷ்ஷ்'ஷிக்கையில் காற்று வெளியேறும் திசையில்
தள்ளச் சொன்னது
கோடை விடுமுறைக்கு வந்திருந்த
ஸ்ருதிக் குட்டி.
தள்ளும் பிரச்சினை
இழுக்கவில்லை அதன்பின்.

ஹரிஸாண்டலும், வெர்ட்டிக்கலும்
வெறுப்பேற்றின.
ஸிப்பை இறக்கையில்
'வெர்ர்' என்று கேட்குமாதலால்
அதுவே வெர்ட்டிக்கல் என்று கொள்வாயாக
என்று கழிவறையில் அருள்வாக்கு சொன்னவன்
நட்பின் முதற்பொருள் பரத்.

சமீபமாய்
இட, வலங்கள்
இடம்பெயர்கின்றன
வண்டியைத் திருப்புகையில்.
எவரேனும் உதவுங்களேன்.

உயிரோசை 15/12/2009 மின்னிதழில் பிரசுரமானது.