Sunday, November 28, 2010

தாகத்தின் இறுதித் துளி


நான் விழுந்து கொண்டிருக்கிறேன்
இப்பொழுது.

எந்தவொரு தடையுமில்லாமல்
எதன் மீதும் பிடிப்புக் கொள்ளாமல்

காற்றின் அந்தர வெளிக்குள்
நான் விழுந்து கொண்டிருக்கிறேன்
யுக யுகங்களாய்.

எனக்கிது பிடித்திருக்கிறது

ஆம்..
எங்கோ ஆழாதியாழத்தில்
இருக்கும் அந்த ஒன்றின் மீதான
தாகத்தின் இறுதித் துளி
நாவினடியில் பத்திரமாய் இருப்பது தெரிந்திருக்கும் வரை
இது எனக்குப் பிடித்ததாகவே இருக்கும்

ஆனால்
அது என்னவென்பதோ
அல்லது நான் எப்பொழுது அதை அடையப் போகிறேன் என்பதோ
அல்லது எனக்கு எப்பொழுது அது கிடைக்கப் போகிறது என்பதோ

இவற்றில் ஏதோவொன்று உறுதிப்பட்டாலும்
அதே கணத்தில்
ஒரு பிரளயம் என்னை சந்திக்கக் காத்திருக்கும்
என்பது தெரிந்திராத வரை மட்டுமே
இது எனக்குப் பிடித்ததாக இருக்கும்

தெரிந்த நிலையிலிருந்து
தெரிந்து கொள்ளாத நிலைக்கான
எனது பயணம்
தேடலின் மீதான ஆசையாகித்
தொலைந்து கொண்டிருக்கிறது

நான் விழுந்து கொண்டிருக்கிறேன்
இப்பொழுதும்..

Read more...

Monday, November 15, 2010

முலைக்கடிகை


கைகளாலும்,முலைகளாலுமான
இரு பரிமாணம்
காலத்தோடுமியைந்து
முப்பரிமாணமானது
இப்போதாவெனத் தெரியவில்லை

ஆனாலும்

தீரத் தீரத்
திருப்பி வைக்கும்
பதைப்பில்லாத கைகள்
தளர்தலில் ஆழ்ந்திருந்தன

ஏனென்றால்

மேசையில்
நேர்குத்தாக நிறுவப்பட்டிருக்கும்
உனதிரு முலைகளினிடையே
சன்னமாய்
உதிர்ந்து கொண்டிருக்கும்
நம் பிரியத்தின் பொன் துகள்கள்
நின்றுபோகும் அளவை
காலத்துக்குள்
காலமாகி விட்டதால். 

Read more...

Sunday, November 14, 2010

ஓவியத்தின் கண்


உள்ளாடைக்குள் உருண்டு கொண்டிருந்த
நிர்வாணம் திசையறு வடிவில் நீண்டிளகி
முகத்தின் பரப்பில்
வெளிறி முடிவுற்றது

பாகங்களைக் குறித்த பிறகு
கண்ணின் படம் வரையத் துவங்கும்
குருடனின் ஓவியத்திலிருந்து
உதிரத் துவங்கின கண்கள்

நேற்று பெய்ததும்,
இன்று பெய்வதும் பொதுவாய்
மழையென்றுணர்ந்தாலும்

அவை வேறென்றறியத்
தேவை

உதிரிக் கண்களில்
நனையாதவொன்றை
மழையென்றழைத்தலில்
இல்லாதவுண்மை

Read more...

  ©Template by Dicas Blogger.

TOPO